Аб умацаванні культурных сувязей паміж Беларуссю і Турцыяй
31.03.2026 г.30 сакавіка пры падтрымцы Генеральнага консульства Рэспублікі Беларусь у Стамбуле адбыліся мерапрыемствы, накіраваныя на ўмацаванне культурных сувязяў паміж Беларуссю і Турцыяй і папулярызацыю беларускай літаратуры за мяжой.
У мэрыі Стамбула адбылася цырымонія падпісання Пагаднення аб супрацоўніцтве паміж Дзяржаўным літаратурна‑мемарыяльным музеем Якуба Коласа і Музеем Ашыян Тэўфік Фікрэт сталічнай мэрыі Стамбула. З турэцкага боку дакумент падпісаў кіраўнік дэпартамента культуры, мастацтва і сацыяльных пытанняў муніцыпалітэта Стамбула спадар Толга Волкан Аслан, з беларускага — намеснік дырэктара Дзяржаўнага літаратурна‑мемарыяльнага музея Якуба Коласа Марыя Казакевіч.
Пагадненне прадугледжвае рэалізацыю сумесных культурных праектаў, абмен вопытам і развіццё гуманітарных кантактаў паміж дзвюма ўстановамі. Падпісанае пагадненне заклікана стаць не проста юрыдычным дакументам, а пачаткам доўгатэрміновага жывога дыялогу паміж музеямі, дзеячамі культуры і жыхарамі дзвюх краін. У планах — правядзенне сумесных выстаў, творчых сустрэч, лекцый і іншых мерапрыемстваў, накіраваных на больш глыбокае ўзаемнае знаёмства з культурай і літаратурай Беларусі і Турцыі.
Важнай часткай дня стала сустрэча ў Стамбульскім універсітэце, прысвечаная творчасці Якуба Коласа. У фармаце жывых зносін са студэнтамі і выкладчыкамі абмяркоўваліся жыццё і спадчына беларускага пісьменніка, гучалі яго творы і іх інтэрпрэтацыі. У ходзе сустрэчы была дасягнута дамоўленасць аб перакладзе вершаў Якуба Коласа на турэцкую мову з наступным выданнем асобнага перакладнога зборніка, што дазволіць істотна пашырыць кола турэцкіх чытачоў, знаёмых з беларускай літаратурай, і стане новым крокам у развіцці культурнага дыялогу.
Бакі выказалі ўпэўненасць, што дасягнутыя дамоўленасці і падпісанае пагадненне паслужаць асновай для новых сумесных праектаў і будуць садзейнічаць далейшаму ўмацаванню гуманітарных сувязей паміж Рэспублікай Беларусь і Турэцкай Рэспублікай.
