Генеральны консул Беларусі ў Стамбуле прыняла ўдзел у Zero Waste Forum 2026
08.06.2026 г.
5 чэрвеня ў Стамбуле пачаў працу міжнародны Zero Waste Forum, які праходзіць пад дэвізам «Road to Antalya: Zero Waste as Climate Action» напярэдадні 31-й Канферэнцыі бакоў Рамачнай канвенцыі ААН аб змяненні клімату (COP31), што адбудзецца ў Антальі з 9 па 20 лістапада 2026 года. Форум разглядаецца як адна з міжнародных пляцовак па прасоўванні практычных рашэнняў у сферы ўстойлівага развіцця, кліматычнай палітыкі і эканомікі замкнёнага цыклу.
На цырымоніі адкрыцця форуму выступіла першая лэдзі Турцыі Эмінэ Эрдаган, пад патранажам якой развіваецца рух Zero Waste у Турцыі і на міжнародным узроўні. У мерапрыемстве прыняла ўдзел Генеральны консул Рэспублікі Беларусь у Стамбуле А. Барткевіч.
На пляцоўцы форуму Генеральны консул сумесна з кампаніяй «ІнПітэкс» прадставілі праект па перапрацоўцы арганічных адходаў і вытворчасці прэміяльных угнаенняў. Прадстаўленая ініцыятыва адлюстроўвае практычны падыход да ўкаранення экалагічных рашэнняў, развіцця цыркулярнай эканомікі і прасоўвання сучасных тэхналогій у сферы ўстойлівага прыродакарыстання.
Работа беларускага боку на палях форуму накіравана на прасоўванне айчынных тэхналагічных распрацовак, устанаўленне новых дзелавых кантактаў і пашырэнне беларуска-турэцкага супрацоўніцтва ў галіне экалагічных і інавацыйных праектаў.
